Badira urte batzuk kanpo espazioen (oro har, eskolako espazioen) inguruko arreta eta ardura piztu dela Eskola Komunitateetan. Horren ondorio dira hainbat eskoletan burutu edo burutzen ari diren espazioen eraldaketak, kasu askotan, jolastokienak. Baina, zenbaitetan, eraldaketa horiek (nahiz eta itxuraz asko aldatu) azalekoak izateko arriskua egoten da, ez badira ezagutzen eraldaketaren funtsak, alegia, zeintzuk diren benetan haurren beharrak kanpo espazioetan, eta zeintzuk diren, ondorioz, espazio horiek bete behar dituzten ezaugarriak haurren beharrak asebetetzeko.
Ikastaro honek behaketa eta hausnarketa bultzatu nahi ditu partaideengan, haurren behar horiek benetan identifikatzen ikasteko, eta horrela, espazioen kudeaketa eta eraldaketa zentzuzkoak zeintzuk diren ezagutzeko, oinarrian dauden benetako arrazoiak ondo ulertuta.
Ikastaroa praktikoa izanik, helburu nagusia izango da hezitzaileek kanpo espazioen ulermenerako eta kudeaketarako tresnak eta baliabideak eurenganatzea. Alegia, hainbat adituren jakintzetatik abiatuta, hezitzaileek euren gaitasunak aberasteko dinamikak proposatuko dira, kanpo espazioek haurren garapenean duten eraginaz hobeto jabetzeko, eta ondorioz, espazio egokien ezaugarriak hobeto definitzen ikasteko.
Horretarako, bloke bakoitzean irakurgaiak bidelagun izango dira, oinarrizko edukiak ezagutzeko, eta dinamika praktikoak proposatuko dira, pausoz-pauso kanpo espazio zehatz baten inguruko azterketa eta eraldaketa proposamenak egin ahal izateko, baina, beti ere haurren garapenerako funtsezko beharren eta espazioaren ezaugarrien arteko lotura ondo identifikatuta.