Euskal Autonomia Erkidegoko (EAE) hezkuntza-komunitatea une historiko batean dago. Hilabete luzeak ekarpenak egiten eta lantzen eman ondoren, 2022ko irailean Euskal Autonomia Erkidegoko Hezkuntzari buruzko Legearen aurreproiektuaren zirriborroa argitaratu zen, egungo eta etorkizunerako hezkuntza sistemaren arau-esparru berri bat ezartzeko asmoz.  

Testuinguru horretan, segregazioak, euskarak eta ikastetxeen titulartasunak zentralizatu dute legearen gainean sortutako hezkuntza-eztabaida. Arreta, beraz, urrundu egin da aurreko urteetan bai estatu mailan, bai nazioartean sortu den eztabaidatik: irakasle lanbidearen erreforma.

XXI. mendearen hasieratik, irakasleen profesionalizazioak arreta berezia piztu du ikerketa zientifikoan eta hezkuntza-politika globalean. Hasierako prestakuntza eta etengabeko prestakuntza, irakasle lanbiderako sarbidea, irakasleen ebaluazioa eta irakasle lanbide garapena kalitatezko hezkuntza lortzeko praktika estrategikotzat jo dira. Hala, kezkagarria da gaia ezustean pasa izana EAEn. Premiazkoa da, beraz, Euskal Autonomia Erkidegoko Hezkuntzari buruzko oinarrien hitzarmenak eta lege aurreproiektuak sortu duen eztabaidan eragitea, EAEko irakasle lanbidearen ereduari buruzko auzia berreskuratuz.

Horiek horrela, asmo handiko ikastaroa da hau. Alde batetik, hezkuntza komunitateak gaiari buruzko ezagutza sakona eskuratzea duelako helburu, eta, bestetik, parte hartzaile guztion artean irakasle lanbidearen arazoari erantzun nahi diolako. Asmo horiek lortze aldera, ikastaro honetan, aztergai dugun gaiaren problematizazioan sakonduko dugu, gainera, orain arte egin diren erreformak ezagutu eta horiei buruz hausnartuko dugu, eta, azkenik, sortzen ari diren eredu berriak ere ezagutuko ditugu. Eredu horiek irakasle lanbideak behar duen eraldaketarako inspirazio-iturri izatea espero dugu.